WASHINGTON ( AP).- Miónes di persona den estadonan na ost i sentro di Merka ayera a sufri un di tres dia kayente i sin èrko debí ku koriente a kai afó okashoná pa vários tormenta ku, ademas, a kousa morto di a lo ménos binti persona.
E ousensia di koriente a obligá hopi persona soportá kasnan sofokante i kuminda ku a daña fin di siman ku temperaturanan di alrededor di 38 grado.
Mas o ménos dos mion di kas den un zona di Nort Carolina i New York i na wèst te ku Illinois
no tabatin koriente ayera mainta. Outoridatnan di empresanan eléktriko a bisa ku posiblemente nan ta keda sin servisio pa vários dia mas. For di djabièrnè, e kondishonnan severo di wer tabata responsabel di a lo ménos 22 morto, mayoria dor di kaida di palunan di mata riba kasnan i vehíkulonan.
E baimentu di koriente tambe a generá e temor di probl emanan de n kamindanan debí ku e personanan ta rekoré kamindanan ku lusnan di tráfiko pagá, pero na Virginia, ayera tabatin ménos tránsito ku normal den hopi lugá debí ku entre e trahadónan federal tabatin esnan ku nan hefenan a duna un dia liber.
Pa evitá ku tráfiko ta pega na Baltimore i Washington, outoridatnan federal i estatal a duna hopi trahadó ayera e opshon di keda kas. E gobernador di Maryland tambe a duna e mesun posibilidat na e trahadónan estatal.
E personanan ku tabata biaha riba karetera di Maryland direkshon Washington tabatin tardansa den e trayekto debí ku e lusnan di tráfiko i otro señalnan tabata kai afó sporádikamente.
