SIUDATA DI GUATEMALA, AP.- Un tribunal a aseptá solisitut di gobièrnu merikano pa ekstraditá eks visepresidente di Guatemala, Roxana Baldetti, pa narkotráfiko. Promé ku esaki e mester paresé dilanti di korte guatemalteko pa prosesonan di korupshon den su kontra.
Algun ora promé, Baldetti a aseptá e ekstradishon meimei di un oudiensia hudisial pa informá tokante e solisitut hasí pa hustisia di Merka. ‘E ekstradishon aki ta wòrdu mirá komo vengansa di kosnan bon ku mi a hasi komo polítiko”, asina el a bisa dilanti di hues i deklará inosente.
Den e oudiensia hasi pa videokonferensha desde prizòn di Santa Teresa, kaminda e ta detené, Baldetti a paresé huntu ku su abogado Fernando Guera i a bisa ku esaki ta un vengansa di Merka kontra dje.
E defensa di Baldetti a pidi pa e wòrdu entregá na outoridat merikano, pero fiskal a pidi tribunal di sentensia pa para esaki te ora e eks visepresidente resolvé e kasonan ku e tin pendiente den Guatemala.
Merka a pidi e ekstradishon formal siman pasa despues ku e guatemalteko a wòrdu akusá den korte di Distrito di Columbia den febrüari. Segun e akusashon, Beldetti i otronan a konspirá pa importá kokaina den Merka entre 2010 i 2015. El a ninga e kargonan.
