MOGADISCIO, SOMALIA, AP.- Eksploshon potente di un trùk den kapital di Somalia a mata por lo ménos 231 persona i a laga mas di 275 persona heridá, segun informashon di senador djadumingu. Esaki ta e atentado mas mortal den e nashon afrikano i outoridat a premirá un oumento den e kantidat di morto.
Abshir Abdi Ahmed a sita dòkternan den hospitalnan kompletamente yen, kual el a bishitá na Mogadiscio un dia despues ku un trùk yen di eksplosivo a dirigí pa un kaya yen di hende serka di ministerionan prinsipal di gobièrnu, inkluyendo esun di asuntu eksterior. Mayoria di e kadavernan no a wòrdu identifiká ainda.
E gobièrnu di Somalia a kulpa Al Shabab, vinkulá na al-Qaeda, pa e atentado na Mogadiscio, kual el a konsiderá komo “un desaster nashonal”. Sin embargo, Al Shabab, kual normalmente ta efektuá atentadonan den áreanan destaká di e kapital, ta permanesé den silensio.
Na komienso di e aña aki Al Shabab a primintí di kontinuá ku e atakenan despues ku gobièrnu di presidente Donald Trump i e mandatario di Somalia a anunsiá operashonnan militar nobo kontra e grupo.
