CORPUS CHRISTI, TEXAS, MERKA, AP.- Ansioso pa demostrá ku e ta na kargo i trahando, presidente Donald Trump a ofresé garantianan optimista na Texanonan afektá pa Harvey.
Na komienso di su bishita na Texas den Corpus Christi, e karavana di Trump a pasa dilanti di palunan ku a kai, bòrchinan di tráfiko ku a kai riba su kaminda pa topa ku bomberonan i outoridat pa un informe.
Trump a para riba un trapi entre dos trùk di bombero i el a dirigí su palabranan pa sentenar di asistente ku a reuní akinan.
E garantianan optimista di Trump ta kontradesí e evaluashonnan ku outoridat di maneho di emergensia ta emití, atvirtiendo un kaminda kompliká i largu.
Brook Long, hefe di Agensia Federal di Maneho di Emergensia i kende tabata huntu ku Trump a atvertí: “Esaki lo bira un rekuperashon frustrante”.
“E rekuperashon ta un proseso pokopoko pero nos ta bai hasi tur kos posibel”, segun afirmashon di Long.
E sekretaria di prensa di Kas Blanku, Sarah Huckabee Sanders, a bisa na reporteronan ku a biaha ku e mandatario ku su bishita ta konsentrá riba koordinashon di diferente nivel di gobièrnu pa impulsa un esfuerso prolongá di rekuperashon.
