NEW YORK, AFP.- Fiskal general di New York a sita e èks presidente Donald Trump, su yu hòmber Don Jr i su yu muhé Ivanka komo parti di un investigashon riba nan negoshinan familiar, segun un dokumento hudisial presentá ayera.
Fiskal Letitia James, demókrata, a omití luna pasa sitashonnan pa haña testimonio den un investigashon sivil di vários aña, segun e dokumento.
E echo a sali na kla despues ku Washington Post a informá na desèmber ku James a pidi Trump pa e presentá na su ofisina dia 7 di yanüari pa entregá su testimonio personalmente. Despues di e informe aki Trump a demanda James argumentando ku e ta violá su derechinan konstitushonal hasiendo un investigashon ku motibunan polítiko.
James ta investigá si e organisashon Trump a reportá ilegalmente balornan falsu di nan propiedatnan pa potensialmente haña bentaha bankario i fiskal. Fiskal a kuminsá e investigashon na mart 2019 i ta sospecha ku e organisashon Trump a sobr’e balorá algun propiedat pa pidi fiansa bankario i despues a reportá balorá muchu ménos na momentu di paga impuesto.
