WASHINGTON, AP.- Sin progreso pa pone fin na e siere parsial di gobièrnu, presidente merikano Donald Trump tin plania di bishita frontera ku México pa reforsá su demandanan pa un muraya. E demókratanan den Kámara di Representante tin plania di oumentá preshon riba Trump i e republikanonan pa habri gobièrnu bek.
Trump a indiká ku e mester di mas di 5.000 mion dòler pa un muraya pa protehá frontera. Sekretaria di prensa di Kas Blanku Sarah Huckabee Sanders a tweet djaluna ku Trump lo probechá di e bishita aki pa “reuní ku esnan ku ta pasando den e krísis humanitario i seguridat nashonal”.
Ku e siere federal den su terser siman, míles di empleado federal ainda no a wòrdu paga i e siere a afektá bida di e merikanonan komun.
Trump a proponé pa konstruí e barera ku heru na lugá di betòn, presentando esaki komo un konseshon kontra kritiká di e demókratanan pa un muraya sólido. “Nan no kier di betòn, pues nos lo duna nan heru”, asina el a bisa.
E demókratanan a bisa bon kla ku e muraya ta inmoral i inefektivo, ademas nan ta preferá un otro tipo di seguridat na frontera finansiá ku e montantenan ya akordá.
