WASHINGTON, MERKA, AFP.- E presidente merikano Donald Trump a bisa ku e lo suspendé imigrashon “di forma temporal” pa Merka dor di e coornavirus nobo. E presidente a anunsiá ku lo suspendé imigrashon pa ‘green card’ durante 60 dia, argumentando ku e medida aki ta duna e merikanonan e oportunidat pa haña trabou bek despues ku e krísis di coronavirus a oumentá desempleo.
Trump a bisa reporteronan di Kas Blanku ku e suspenshon lo drenta na vigor despues ku e firma un òrdu ehekutivo awe, despues di a hasi un anunsio vago djaluna anochi riba Twitter. Di e forma aki e merikanonan ta promé den rei pa haña trabou ora Merka habri bek.
E presidente a agregá ku e medida ta konta solamente pa individualnan ku kier haña residensia permanente.
E pandemia a afektá e ekonomia mundial gravemente. E kantidat di morto pa e coronavirus a surpasá 170.000 kaso na mundu i a kantidat di infekshon a superá 2,5 mion, lagando vários ekonomia den un spiral negativo miéntras mayoria gobièrnu ta purba haña un forma nobo pa sali for di e krísis aki.
E suspenshon kompleto di sierto aktividat komersial a afektá e merkado di krudo, kaminda produkshon ta mas haltu ku demanda. Mayoria pais den Europa ta relahando e medidanan di karentena pa suavisá e kosto ekonómiko, ounke ainda outoridat ta prohibí tur aktividat ku ta atraé multitut grandi òf aglomerashon di hende.
Merka a kombertí den episentro di e pandemia, ku mas di 42.000 morto 784.000 infekshon. Presidente Trump tabata embolbí den vários konfrontashon ku gobernadornan demókrata dor ku e ta motivá protestanan kontra e medidanan di lockdown den vários estado.
