WASHINGTON, AP.- Despues di vários aña di retroseso i stankamentu, presidente Donald Trump lo presentá un otro plan di inmigrashon den un intento pa konvensé públiko i legisladornan merikano ta nesesario pa reforma e sistema di inmigrashon aktual den e pais.
E inisiativa nobo, impulsá pa Jared Kushner, yerno i asesor di Trump, ta enfoká riba seguridat na frontera i modifikashon di e sistema aktual di “green card”, solamente pa personanan altamente kalifiká, ku un karera universitario i ku tin un oferta di trabou, i no proveé esaki simplemente paso ya e inmigrante tin un pariente ku ta biba na Merka.
E plan a kousa un reakshon miksto entre e senadornan republikano. E inisiativa lo enfrentá oposishon den Kongreso, i e posibilidat pa yega na un akuerdo riba e tema sumamente kontroversial durante e temporada di elekshon no ta probabel.
Funshonarionan di gobièrnu a bisa ku e plan ta pa krea un sistema di visa basa riba punto, similar na e sistema na Canada i algun pais mas.
