WASHINGTON, AP.- Un korte federal di apelashon a determiná djabièrnè ku e registronan finansiero di presidente Donald Trump mester keda entregá na Kámara di Representante.
Korte federal di apelashon di e kapital a informá ku e legisladornan mester haña e dokumentonan aki serka Mazars USA, e kompania ku ta brinda servisio di kontabilidat na Trump.
E presidente a presentá den korte, pa purba impedí ku Mazars ta entregá e registronan. Trump por apelá e desishon den Korte Supremo.
Komishon pa Supervishon i Reforma di Gobièrnu di Kámara di Representante di Merka a eksihí Mazars pa entregá e registronan, ku ta inkluí dokumento di 2011 te 2018 i kual kámara di representante kier pa motibu di un investigashon tokante registronan finansiero di e presidente i posibel konflikto di interes. E lista di dokumento no ta menshoná e mandatario su deklarashonnan di impuesto, kual ta pasando dor di e mesun disputa legal ku e kaso aktual.