WASHINGTON, AP.- Presidente Donald Trump a ripití su aseverashon ku su antesesor di Kas Blanku a intervení su komunikashonnan i a insinuá ku kansier Angela Merkel tabata víktima di e mesun tipo di spionahe di gobièrnu di Barack Obama.
Merkel a realisá su promé bishita pa Kas Blanku desde ku Trump a asumí presidensia.
E akusashonnan di Trump kontra Obama a okashoná reakshonnan den Washington ku a kousa furia, miéntras legisladornan republikano i demókrata a bisa ku no tin evidensia pa proba e afirmashonnan aki.
Djaweps, bosero Sean Spicer a definí e komentarionan di presidente ripitiendo un rapòrt publiká pa promé biaha pa un analista di Fox News, ku tabata sigurá ku e agensia britániko di spionahe elektróniko a yuda Obama intervení den e komunikashonnan di Trump. E agensia a ninga e akusashon kategorikamente i embahador britániko na Washington, Kim Darroch, a keha direktamente ku outoridat di Kas Blanku.
Djabièrnè Trump a purba distansiá di e akusashonnan.
Den su promé enkuentro ku Merkel, Trump a reafirmá su apoyo fuerte di Merka pa NATO, pero tambe el a reiterá su postura ku e aliadonan militar mester “paga su parti hustu” pa e kosto di defensa. Tambe el a bisa ku mayoria pais debe montantenan grandi di plaka pero no kier a identifiká Alemania komo un di e nashonnan.
E agènda di ámbos inkluso diskushonnan tokante kon pa fortalesé NATO, kombatí Estado Islámiko i resolvé e konflikto na Ukrania.
E reunion a wòrdu posponé desde djamars debí na un tormenta di sneu.
