MIAMI, MERKA, AFP.- E èks presidente Donald Trump, a deklará su mes no kulpabel ayera despues ku el a paresé dilanti di un tribunal federal na Miami komo akusado pa e forma negligente ku el a manehá sekretonan di Estado.
“Sin duda nos ta deklará no kulpabel”, segun abogado di Trump, Todd Blanche.
E èks presidente, ku lo kumpli 77 aña djaluna, a yega e tribunal entre medidanan di seguridat drakoniano i a keda ketu durante e seshon, ku un ekspreshon serio, segun indikashon di un periodista di AFP.
Ministerio Públiko ta akus’é di a keda ku dokumentonan konfidensial despues ku el a sali for di Kasa Blanku, kaminda tabatin informashonnan sekreto manera armanan nuklear.
Un hues federal a lesa e 37 akusashonnan den su kontra, inkluyendo “retenshon ilegal di informashon relashoná ku seguridat nashonal”, “opstrukshon di hustisia” i “testimonio falsu”.
Ta promé biaha ku un eks presidente di Merka ta wòrdu akusá na nivel federal.
E kaso di Miami ta parse di por bira mas eksitoso ku esun di New York, ounke Trump a demostrá na mas ku un okashon ku e por sobrebibí su problemanan polítiko, kombirtiendo nan den un oportunidat.
Despues ku el a risibí vários petishon di outoridatnan, Trump a disidí pa entregá vários kaha ku mas o ménos 200 dokumento konfidensial.
Konvensí ku e no a entregá tur e dokumentonan den su poder, agentenan di FBI ehekutá un entrada hudisial den su kas na Mar-a-Lago riba 8 di ougùstùs i a haña kahanan ku 11.000 dokumento aden.
