LA HABANA, CUBA, AFP.- Seis persona a fayesé na Cuba, pa motibu di áwaseru fuerte ku a kai den último dianan na ost i sentro di Cuba. Esaki a kousa hopi daño material, segun un informe nobo di outoridatnan ku prensa ofisial a haña djamars.
E yobida, a kuminsá djaweps, i a redusí gradualmente den komienso di siman. E awa a kuminsá baha den diferente provinsianan i míles di personanan evakuá a kuminsá regresá nan kasnan bèk, segun indikashon di e bosero di gobièrnu di Granma.
Seis persona a muri, kuater den provinsianan oriental di Granma, Las Tunas i Santiago de Cuba, i dos den provinsia sentral di Camagüey, segun e mesun fuente.
“Indudablemente, esaki ta un evento ku no ta típiko”, presidente kubano, Miguel Díaz-Canel, a deklará durante un reunion via video djaluna anochi ku outoridatnan provinsial.
“Ounke nos a kustumbrá di traha den kondishonnan di áwaseru fuerte, e suseso aki tin di aber ku kambio di klima”, asina el a agregá.
Segun e hefe di estado, e inundashonnan a yega un nivel nunka bisto den e último 30 añanan.
Vários provinsianan den parti ost di e pais tin algun luna ku nan a wòrdu afektá pa sekura.
