OXFORDSHIRE, INGLATERA, AP.- E presidente merikano Donald Trump a pasa djaweps di un lugá kontroversial pa un otro, bandonando e reunion di NATO na Bruselas i trasladá pa Gran Bretaña, kaminda el a topa ku un gobièrnu den konflikto i protestanan ku a siguié tur kaminda ku el a bai. Sinembargo, tur kos tabata trankil durante su seremonia di bonbiní den palasio Blenheim.
Sentenar di manifestantenan tabata grita pafó di e residensia di embahador merikano kaminda Trump ta keda. Esaki tabata un antisipashon di e protestanan ku ta warda Trump durante su dos dianan na Gran Bretaña.
Trump a wòrdu hibá rápidamente pa un oásis di un kaluroso bonbiní den resepshon di gala na Blenheim, e lugá di nasementu di Winston Churchill, e lider ku e presidente a bisa ta un modelo di liderazgo. Esaki tabata solamente un di e vários rekoridonan den helikòpter riba e agènda di Trump, kual su ekipo a opta pa mantené leu di e sentro di London i protestanan. Esaki sin duda lo proporshoná algun di e imágennan ku lo definí su promé biahe ofisial na Gran Bretaña.
E promé minister Theresa May, kual su gobièrnu a wòrdu asotá ku renunsianan debí na e kontroversia pa Brexit, a wòrdu risibí pa Trump na e palasio.
Promé ku el a bandoná Bruselas, Trump a pone importansia riba e protestanan, pero a rekonosé ku e ta premirá un tenshon ku su yegada na Gran Bretaña.
Durante su 28 oranan na Bruselas, Trump a papia malu di eks aliadonan di NATO, el a generá duda riba su kompromiso ku e organisashon di defensa mutuo i el a generá un seshon di emergensia den e organismo di 29 miembro.
