SAN JUAN, AP.- Presidente Donald Trump a kritiká gobernantenan di Puerto Rico, un dia despues ku míles a protesta, eksigiendo pa e gobernador di e isla renunsia dor di e krísis pa kombersashonnan filtra, kaminda e ta hasi bofon di esnan ku e ta representá.
“Tin hopi kos malu pasando na Puerto Rico”, asina Trump a tweet agregando ku “e gobernador ta wòrdu ataka” i a burla di e alkaldesa di Sam Juan, Carmen Yulin Crus, kende a kritiká e presidente fuertemente, kalifikando e komo “un persona inkompetente i despresiabel, i kende e lo no konfia bou di ningun sirkunstansia”.
Trump a argumentá ku gran parti di e fondonan aprobá pa Kongreso despues di Orkan Maria “a wòrdu desperdisiá” i a agregá ku “gran parti di Puerto Rico ta korupto i ta hòrtando e gobièrnu di Merka”.
Entre tantu, gobernador Ricardo Rossello a emití un komunikado bisando ku e ta respetá e manifestashon di djárason komo un “ehersisio demokrátiko” i “un manifestashon natural relashoná ku susesonan resien”, pero ku e lo no renunsia.
“Mi ta kere firmemente ku ta posibel pa restourá konfiansa”, asina Rossello a bisa, agregando ku el a pidi i lo sigui ekspresá su diskulpa na e pueblo portorikeño.
