MERKA, AP.- Presidente Donald Trump a purba desviá kualkier kulpa di su gobièrnu pa morto di dos mucha guatemalteko e luna aki miéntras nan tabata den kustodia di outoridat na frontera, segurando ku nan tabata “hopi malu” na momentu ku nan a yega, apesar ku outoridat di migrashon a indiká ku ámbos a pasa e eksámennan di salú.
E mama di e mucha ku a fayesé riba Bispu di Pasku a bisa djasabra ku su yu tabata saludabel na momentu ku el a start su travesia rumbo pa Merka den kompania di su tata.
E sekretaria di Seguridat Nashonal Kirstjen Nielsen a bishitá outoridat médiko di Patruya na Frontera. Outoridat ta primintí tèstnan di dòkter mas riguroso pa e muchanan migrante.
Trump, kende su gobièrnu a wòrdu kritiká fuertemente pa e mortonan, a kulpa e demókratanan i nan “polítikanan di migrashon patétiko, kual ta permití e migrantenan pa realisá un biahe largu pensando ku nan por drenta nos pais ilegalmente”.
Ademas, el a señalá ku ámbos mucha “tabata hopi malu promé ku nan a wòrdu entrega na Patruya na Frontera”.
Trump a menasá di terminá yudansa pa El Salvador, Guatemala i Honduras. El a hasi atvertensianan similar den pasado, sin tuma medida.
E gobièrnu di El Salvador a rechasá e afirmashonnan di Trump, kaminda e mandatario merikano ta señalá ku e no ta hasi sufisiente pa para migrashon den Merka. E pais sentroamerikano señalá di a realisá mehorashonnan ekonómiko i sosial pa terminá ku e fenómeno migratorio aki.
Den un komunikado publiká djasabra, e gobièrnu di El Salvador a informá di a realisá un kampaña den medionan di komunikashon i a hasi vários yamada na e pueblo pa no riesga nan bida ni esun di nan famia, spesialmente si ta trata di mucha i adolesentenan.
