HOUSTON, TEXAS (AP).- E pretenshonnan di Presidente Donald Trump, den e sentido ku e lo a ordená konstrukshon di 115 mia di muraya nobo na Texas ta parse konfuso, ya ku ta parti di trabounan ku ta pagá kaba i ta den ehekushon masha tempu. Trump a tweet na prinsipio dje siman aki bisando ku e ta den Oval Office na Kas Blanku i ku el a kaba di otorgá un kontrato di término largu pa konstrukshon di un sekshon adishonal di 115 mia di muraya na Texas.
Un dia despues el a bolbe bisa ku e ta siguiendo normalmente ku e konstrukshon no opstante ku gobièrnu ta parsialmente será pa motibu di su insistensia pa haña mas plaka pa konstruí e muraya ku el a primintí na frontera ku México. Pero ni Kas Blanku ni e Departamento di Seguridat Doméstiko a reakshoná riba loke Trump ta pretendé.
Ora ku periodistanan a puntra Trump di su plannan pa konstrukshon dje muraya i tambe pa selebrashon di Pasku e siman aki, el a bisa ku el a duna òrdu kaba pa konstruí 115 mia mas di muraya na Texas. E muraya lo ser konstruí i mas rápido ku ta posibel. E lo ta aya na fin di luna di yanüari pa komienso dje trabounan.
Echo ta ku Trump no por duna ningun kontrakt di konstrukshon, sino ku ta Duana merikano i Protekshon di Frontera i US Army Corps of Engineers por duna kontraktnan pa konstrukshon di muraya na frontera, i esaki despues ku kongreso aprobá e fondonan i despues di lunanan largu di planifikashon.
Na luna di mart Kongreso a aprobá fondonan pa 33 mia (53 km) di konstrukshon na sur di Texas (Rio Grande), ku ta e koriente mas drùk i konosí ku imigrantenan ilegal ta usa pa trata di drenta Merka. Asina mes e agensianan a duna di konosé e tempu ei ku e konstrukshon na Rio Grande Valley lo kuminsá na febrüari 2019.
