TURKIA.- Ofisialmente Turkia a denominá e invashon ruso kontra Ukrania komo un guera i el a bisa ku e lo restringí algun barku di guera di pasa den awanan klave ku ta bou di su supervishon. Segun ekspertonan, e desishon aki lo por ta unu ku ta bai stroba e aktividatnan militar ruso den e region.
Ayera forsanan ruso a lansa atakenan na tera, den laman i den aire riba Ukrania den un dje atakenan di mas pisá di un estado riba un otro na Europa for di Segundo Guera Mundial.
E embahador ukraniano na Turkia, Vasyl Bodnar a bai televishon siman pasá i hasi un apelashon riba e gobièrnu di Ankara pa esaki sera su pasashinan klave pa barkunan di guera Ruso bou dje tratado di 1936 dje Konvenshon di Montreux. Turkia a bisa ku e lo por hasi esei solamente si ofisialmente e rekonosé e konflikto komo un guera, i esei ta loke el a hasi tambe.
Presidente Turko, Recep Tayyip Erdogan a bisa ku su gobièrnu lo usa e outoridat ei solamente pa prevení un eskalashon dje krísis.
