BRUSELAS, AP.- Union Europeo a anunsiá djaluna ku lo tin sanshon kontra 11 dirigente venezolano, inkluyendo e visepresidente nobo Delcy Rodriguez.
E prohibishonnan di biahe i e konhelamentu di vienes a wòrdu poné debí ku e individualnan a señalá ku “nan ta responsabel pa violashonnan di derechi humano i di daña e demokrasia i e estado di derechi den Venezuela”, asina e bloke europeo a bisa.
Ku e sanshonnan aki, kual ta konta pa e hefe di ehérsito i direktor di agensia nashonal di inteligensia, e kantidat di funshonarionan venezolano ku a haña sanshon di UE a subi na 18.
E sanshonnan ta un forma pa buska un solushon demokrátiko pa e krísis, promové stabilidat polítiko i kumpli ku e nesesidatnan urgente di e pueblo venezolano.
Venezuela a konsiderá e medida komo un “agreshon kontinuo” i “inherensista” i a afirmá ku lo no aseptá menasanan di ningun manera òf di grupo di paisnan.
Kondenando e medidanan, e gobièrnu a bisa den un komunikado ku Union Europeo ta “perturbá pas kontra e pas polítiko den Venezuela dor di mete den su asuntunan interno i atentá kontra trankilidat i diálogo”.
Presidente venezolano Nicolás Maduro a deklará ganadó di elekshonnan di luna pasa kual a wòrdu bòikotiá pa oposishon i kaminda vários gobièrnu i entidatnan na nivel internashonal a konsiderá komo ilegítimo.
