SURFSIDE, MERKA, AFP.- Por lo ménos un persona a muri i desénas mas ta pèrdí despues ku parti di un edifisio di apartamentu a kolèps serka di Miami, kaminda ekiponan tabata buskando mas sobrebibiente djaweps.
Un porshon importante di e edifisio den siudat di Surfside serka di nort di Miami Beach a kolèps segun imágennan di video ku a keda publiká.
“A haña sinkuentitres persona i ainda 99 ta pèrdí”, segun indikashon di e hefe di polis di Miami-Dade, Freddy Ramirez. “Esaki ta dor di vários motibu, ainda nos ta den e fase preliminar” di búskeda, asina el a agregá.
E kousa di e insidente i kantidat di personanan ku tabata den e edifisio no ta konosí, segun e komisario di Miami-Dade, Sally Heyman.
Alrededor di 55 apartamento a keda afektá segun indikashon di e hefe asistente di kuerpo di bombero di Miami Dade, Ray Hadallah den un konferensia di prensa. El a agregá ku na yegada di servisionan di emergensia a evakuá 35 persona for di e edifisio. Segun medionan lokal, a konstruí e edifisio na aña 1981 i e tabatin 130 unidat.
