WASHINGTON, MERKA, AFP.- Un grupo di kreador di kontenido di TikTok a protestá dilanti di Kapitolio merikano djárason, kontra di e proposishon pa prohibí e aplikashon popular pa kompetí videonan di e propiedat chines, meimei di temornan ku esaki ta representá un menasa pa seguridat nashonal di e pais.
Legisladornan i funshonarionan di gobièrnu a bisa ku e empresa matris di TikTok, ByteDance, por pasa datonan di e usuarionan pa gobièrnu di Beijng i a pidi pa retirá esaki di tur ‘appstore’ a ménos ku bende e aplikashon ku un empresa merikano.
Un grupo di alrededor desénas di adolesente, maestronan i doñonan di negoshi a reuní den Kongreso pa diskutí nan oposishon pa e posibel prohibishon i pone atenshon riba e benefisionan di TikTok.
E aplikashon, ku resientemente a revelá ku e tin 150 mion usuario na Merka, ya ta prohibí riba tur aparato di gobièrnu federal i ta blòkiá na vários universidatnan públiko, pero legisladornan i presidente Joe Biden ta konsiderando un prohibishon kompleto.
