LUMBERTON, NORTH CAROLINA, MERKA, AP.- Un patruyero di North Carolina a tira i mata un hòmber armá djamars durante un operashon di reskate, miéntras míles di persona a risibí òrdu di buska den zonanan mas haltu debí ku e inundashon di orkan Matthew ta move den áreanan mas plat. Ku tono di disgustu, e gobernador Pat McCory a pidi tur hende pa stòp di resistí òrdunan di outoridat pa keda leu di barikadanan riba kamindanan inundá.
E sifra di personanan ku a fayesé na Merka a subi na 30, mitar di nan na North Carolina. Outoridatnan a reportá kuater morto mas: shofùrnan ku e awa a lastra den nan vehíkulonan i un hòmber kual su outo a wòrdu plècha den un palu. Na Florida tabatin 8 morto i na Haiti mas di 500. Ademas tabatin víktimanan na Florida, Georgia, Sur Carolina i Virginia.
Na Lumberton, un di e zonanan mas kastigá, un patruyero tabatin dos polis di kondado Robeson riba un kaya inundá na bordo di un Humvee n’e momentu ku nan a topa ku un hòmber armá.
Gordon no a bisa dikon e hòmber tabata disgustá i a revelá masha tiki detaye di e tiroteo aki.
