CARACAS (AP).- E manifestashonnan na Venezuela no a terminá, solamente nan ta birando mas intensivo dia pa dia. Venezolanonan di tur edat, klase sosial i profeshon a bolbe subi kaya ayera den e kapital di Caracas pa asina demanda Presidente Nicolás Maduro pa baha i pa ekspresá nan sosten pa e hóben lider opositor Guaidó kende a outo-proklama su mes komo presidente interino dje pais. Venezolanonan a sali bisti den tur sorto di paña i koló i hopi di nan ku nan bandera nashonal i otronan ku pankarta ku palabranan di protesta a subi kaya pa di tantísimo biaha. Un dje manifestantenan asta a benta un kantidat di Bolivar devaluá den laria.
E manifestantenan a subi kaya komo resultado di un petishon hasí di parti di e lider opositor Juan Guaidó pa monta demonstrashonnan masal, no opstante ku polis i militarnan a trata di kibra e manifestashonnan di algun dia pasá.
Venezolanonan a duna di konosé bon kla ku nan no ke biba mas bou di diktadura di Maduro. Si tin di sigui paso di hopi venezolano e último dos añanan, hopi a bandoná e pais en buska di un mihó bida, i Kòrsou no ta un eksepshon. Hopi tienda i supermerkadonan prinsipalmente den Caracas ta kompletamente bashí, yuda ku no tin alimento pa e pueblo. Hopi lider den paisnan rònt mundu a ofresé nan sosten kaba na Guaidó, pero bou dje kondishon ku lo organisá elekshonnan demokrátiko i liber atrobe den e pais.
