CARACAS, AP.- E kansier ruso Serguei Lavrov a boga pa medidanan polítiko, diplomátiko i diálogo pa logra ku Venezuela ta sali for di e krísis. El a anunsiá tambe ku Moscow lo profundisá den e koperashon ekonómiko, di koriente i militar ku e nashon suramerikano.
“Nos kier pa tur hende kumpli ku nan obligashonnan internashonal pa solushoná tur disputa atraves di medidanan pasífiko i no usa violensia”, asina el a afirmá atraves di un intérprete merikano.
E kansier a probechá di e oportunidat pa kondena e sanshonnan imponé pa Washington kontra Venezuela i ta konsiderá esakinan komo “inaseptabel” konsiderando ku nan ta afektá proyektonan sosial i humanitario.
E minister ruso Lavrov a lamentá e frakaso di otro inisiativanan di diálogo ku a wòrdu impulsá den pasado. Lavrov a reuní ku e visepresidente Delcy Rodriguez, su kolega venezolano Jorge Arreaza, e minister di Finansa Simon Zerpa i e visepresidente di ekonomia i e minister di Industria Tareck El Aissami.
