CARACAS, AP.- Asamblea Nashonal di Venezuela a deklará un krísis humanitario alimentisio i a anunsiá ku lo kuminsá tuma akshon pa ehersé mas kontrol riba polítikonan di gobièrnu.
E skarsedat di kuminda i inflashon haltu den Venezuela a generá intrankilidat entre algun organisashon humanitario i entidat dediká na e investigashon denunsiando e oumento di kasonan di desnutrishon.
E presidente di Asamblea Nashonal, diputado Julio Borges, a afirmá ku via e deklarashon aprobá, oposishon kier oumentá e preshon pa solushoná ku e problema kaminda sentenar di persona ta buska kuminda den ko’i shushi. Tambe a aprobá e kreashon di un komishon spesial ku ta ehersé funshonnan di kontrol riba polítikanan alimentisio di gobièrnu i plan di importashon estatal.
E segun estudio di luna pasa di un komishon spesial di Asamblea Nashonal a revelá ku kasi 3 mion persona ta kome for di ko’i shushi. Outoridat no a duna komentario riba e estudionan. E investigashon di e tres universidatnan a revelá ku den 2016 tabatin 81,8% kas den situashon di pobresa. E sifra ta kasi dòbel di e registro di 2014, ku tabata 48%.
