CLAREMONT, NEW HAMPSHIRE, MERKA, AP.- E yu di Bernie Sanders a anunsiá djamars ku e ta bai presentá den elekshon legislativo pa New Hampshire.
Levi Sanders, ta uni e shete koreligionarionan demókrata i tres republikano den e kontienda di e aña aki pa e asiento den poder di e legislador demókrata Carol Shea-Porter, kende no ta presentá pa reelekshon.
“Ta un oportunidat úniko pa skucha e hòmber i muhénan trahadó di New Hampshire, riba asuntunan ku ta importante pa nan”, asina Sanders a bisa den un deklarashon pa anunsiá su kandidatura.
Sanders, di 48 aña, i kende a biba na New Hampshire durante 15 aña, ta e famia mas resien di e eks kandidato presidensial i senador independiente pa Vermont pa anunsiá su kandidatura pa un kargo públiko. E ruman di kriansa di Levi Sanders, Carina Driscoll, ta aspirá pa alkaldia di Burlington, Vermont, un kargo okupá pa Bernie Sanders kuater dékada pasá.
Den su anunsio, Levi Sanders a bisa ku e ta respaldá un sistema di salú universal, un oumento di salario mínimo, legislashon sensato riba arma di kandela i universidat grátis. Ademas, el a primintí di kombatí e krísis di droga.
