UKRANIA.- Presidente di Ukrania, Volodymyr Zelensky durante un transmishon via di medionan sosial a hasi un apelashon pa yudansa, miéntras ku e atakenan ruso tabata kontinuá den su pais. “Fin di mundu ta yegando”, asina Zelensky a duna di konosé durante un konferensia di prensa televisá na Kyiv.
El a hasi un apelashon riba lidernan Oksidental ku a nenga di kontestá yamadanan, pa deklará un zona aéreo prohibí riba Ukrania. “Si bo no tin e poder pa sera zonanan pa bula, awèl duna mi avion”, asina Zelensky a bisa. Mas aleu tambe e lider ukraniano a hasi un yamada pa negosiashonnan direkto ku Presidente ruso, Vladimir Putin.
“Bon Dios, kiko bo ke? Bandoná nos lugá. Si bo no ke bai awor, sinta ku mi anto na mesa di negosiashon, pero na 30 meter leu, manera a hasi ku Presidente franses Emmanuel Macron i Kansiyer aleman Olaf Scholz”, asina Zelensky a deklará. “Sinta ku mi i papia. Kiko bo por tin miedu di dje? Nos no ta un menasa pa niun hende”.
E komentarionan aki a bini un siman despues ku Putin a ordená un invashon militar na Ukrania. For di e momentu ei Rusia a sigui progresá ku su atakenan riba siudatnan despues di un intento di su forsanan pa rondoná e kapital di Kyiv.
Den último oranan di ayera ta ser bisá ku Rusia a lansa mas ku 480 misil durante kombatenan den zùit di Ukrania. Pero e ukranianonan ta dunando bataya fuerte kontra e trupanan di Putin.
