PARIS, AP.- Presidente Franses Emmanuel Macron a pidi un evaluashon di posibel medidanan di seguridat kontra protestanan, un dia despues ku un manifestashon kontra oumento di impuesto a Paris i kosto haltu di bida a kombertí den e disturbio mas grave den un dékada den Fransia.
Algun ora despues ku el a regresá e kapital franses for di e kumbre G20 na Argentina, Macron a tene un reunion di emergensia den Palasio Elysee miéntras ekiponan a purba retirá outonan kima, glasnan kibra i grafiti di avenida famoso, Champs Elysees i otro sitionan famoso na Paris.
Un total di 133 persona a resultá heridá, inkluyendo 23 agente, despues ku un multitut di hende a kousa destrukshonnan den vários kaya den e kapital djasabra.
Algun elemento polisial a deskribí di a topa ku un violensia “sin presedente”, inkluyendo manifestantenan ku a usa martin, hèrmèntnan di hardin, bleki i piedra den konfrontashonnan físiko ku agentenan den e kapital.
E chalekonan kolo hel, kual outomobilistanan franses mester tin den kaso di emergensia, ta un emblema di e movementu di siudadanonan ku ta protesta kontra e oumento di impuesto di kombustibel.
Agentenan mester a akudí na diferente kandela den seis edifisio. 112 vehíkulo a wòrdu kima.
