SIUDAT DI MÉXICO, AP.- E gobièrnu di siudat di Tijuana a anunsiá djasabra ku a sera e refugio pa migrantenan den un edifisio deportivo serka di frontera ku Merka. Esaki a akohé kasi 6.000 sentro amerikano ku kier haña asilo riba e teritorio merikano.
Tur migrante a wòrdu trasladá pa un sentro ku tabata wòrdu usa pa eventonan kual ta keda mas leu di frontera. E siudat a indiká atraves di un komunikado ku e refugio den Unidat Deportivo “Benito Juarez” a wòrdu sera debí na mal kondishon sanitario.
E kondishonnan den e sentro no tabata saludabel. E edifisio deportivo tabata parsialmente inundá, kaminda migrantenan mester a permanesé den un espasio ku por akohé solamente mitar di e kantidat total ku tabata refugia den e sentro. Lodo i infekshonnan tambe ta loke a dominá den e lugá.
E último migrantenan a wòrdu trasladá den bus pa e refugio nobo ku ta keda 15 kilometer leu di e frontera na Otay Mesa i 22 kilometer di San Ysidro, serka di kaminda e migrantenan por hasi petishon pa haña asilo i biba den Merka.
E refugio nobo ta na enkargo di outoridat federal.
Migrantenan entrevista pa The Associated Press a afirmá ku nan ta hui di pobresa i violensia den nan propio pais.
