PARIS, AP.- AE disturbionan urbano mas violento registrá na Fransia den mas di un dékada, a inkluí aktivistanan konosí komo “djèket hel” ku a sende vehíkulonan na kandela, kibra bentananan, sakia negoshinan i pinta grafiti riba Arc de Triomphe.
E manifestantenan a protesta pa oumento di impuesto i kosto haltu d bida. Nan a konfrontá polisnan antidisturbio franses, kende a sera e zonanan turístiko mas popular den e siudat. Ademas, e agentenan a usa gas lakrimogeno i kañon di awa den un intento pa kalma e situashon riba kaya. Por lo ménos 110 persona a resultá herida.
E presidente franses Emmanuel Macron a denunsia e violensia for di na kumbre G20 na Argentina i a indiká ku esnan ku a agredí polis i vandalisá Arc de Triomphe lo wòrdu kastigá pa nan aktonan. El a agregá ku lo tin un reunion gubernamental di emergensia pa papia tokante e protestanan djadumingu.
El a agregá ku “nada no ta hustifiká” e atakenan kontra polis, e sakeo di tiendanan ni kimamentu di edifisionan, el a ninga di rospondé pregunta di periodistanan tokante e situashon na Paris.
A trata di e terser fin di siman konsekutivo di konfrontashonnan den e kapital franses kaminda aktivistanan ku ta forma parti di un movementu nobo di protesta ta involukrá. Ta trata di aktivistanan ku djèket hel. Esaki tabata un di e dianan mas violento desde 2005.
Míles di polis franses a wòrdu desplegá pa purba kontené e violensia, kual a kuminsá djasabra mainta serka di Arc de Triomphe i a kontinuá te den oranan di anochi. Polis parisino a informá ku e disturbionan a laga 133 herido i 412 persona arestá na Paris.
