TIJUANA, MÉXICO, AP.- Migrantenan kamerunes ta kana tur mainta, rumbo pa e krusada na frontera mas transitá entre México i Merka, sperando riba un dia di suerte, kaminda nan lo haña e oportunidat pa pidi asilo.
E kamerunesnan ku ta skapa di nan pais a bisa ku e kantidat di migrantenan ku kier pidi asilo na Tijuana ta riba 10.000. Tres luna pasa tabatin 4.800 nòmber.
“Mi ta kana bai frontera tur dia pa si un lugá bira bashí”, asina un migrante di 35 aña a bisa, kende tin dos luna ta warda na Tijuana. Ainda tin 6.000 nòmber su dilanti, riba un lista di espera pa pidi asilo na San Diego.
Sifranan di gobièrnu mehikano i di investigashonnan di The Associated Press ta indiká ku por lo ménos 40.000 migrante a yega frontera i ta riba lista di espera, e promé paso di un proseso largu pa pidi asilo òf presentá dilanti di korte di inmigrashon merikano despues di keda debolbé pa México.
E sifra ta indikashon di un oumento grandi kompará ku komienso di aña. No ta evidente kuantu a drenta Merka ilegalmente, òf kuantu a disidí pa keda México òf regresá pa Sentroamerika.
