COLOMBO, SRI LANKA, AP.- Mas di 290 persona a muri i sentenar a resultá heridá den nuebe eksploshon ku a sakudí iglesianan, hotèl i otro sitionan na Sri Lanka riba Djadumingu di Resurekshon. Esaki ta e episodio di violensia mas pió ku e pais na sùit di Asia a pasa aden desde final di su guera sivil un dékada pasá.
E minister di Defensa, Ruwan Wijewardena, a bisa ku trata di un atake terorista kometé pa ekstremistanan religioso, i polis a indiká ku 13 sospechoso a wòrdu arestá, ounke te ainda ningun hende a atribuí responsabilidat di e atake aki. Outoridat ta kere ku mayoria eksploshon a wòrdu aktivá pa atakantenan suisidio, segun indikashon di Wijewardena,
E eksploshonnan a mata fiel i wéspetnan den un esena tras di otro. “E pueblo no tabata por a komprondé kiko ta pasando. Pániko tabata prevalesé i tabatin sanger tur kaminda”, segun indikashon di Harischandra, di 24 aña.
E kansier di Sri Lanka a bisa ku a rekuperá kadaver di por lo ménos 27 siudadano di diferente pais estranhero.
E gobièrnu di Sri Lanka a imponé un toke de keda na nivel nashonal desde 6 or di atardi te 6 or di mainta i a blòkia Facebook i otro retnan sosial, indikando ku mester restringí publikashon di informashon falsu i disminuí tenshonnan den e pais ku 21 mion habitante.