PORT-AU-PRINCE (AFP).- Lidernan di Haiti a yega na un akuerdo polítiko pa forma un konseho presidensial di transishon pa 22 luna, i awor ta spera reakshon dje ehekutivo saliente pa por restourá òrdu den e pais ku ta batí pa gèngnan violento.
E konseho ei di nuebe miembro shete ku derechi di voto i dos opservador lo integrá e representantenan di e prinsipal partidonan dje pais, komo tambe sektor privá i di sosiedat sivil. Su mandato lo terminá 7 di febrüari di 2026, segun e dokumento. E outoridatnan nobo lo sustituí Ariel Henry, e promé minister haitiano hopi kuestioná, ku a anunsiá su retiro dia 11 di mart.
E promé trabou dje konseho ta di eligí un promé minister ku, den kolaborashon ku e konseho, lo designá e gobièrnu enkargá pa kondusí e pais pa yega na “elekshonnan demokrátiko, liber i kreibel’, segun e akuerdo.
Ningun dje miembronan dje konseho òf dje gobièrnu por presentá pa e elekshonnan ei. Haiti, ku no tin elekshon for di 2016, a sufri añanan di instabilidat polítiko i di inseguridat.
Djadumingu último, e futuro miembronan dje konseho a manda pa Caricom un akuerdo polítiko i un dekreto pa nan entrada. E bloke regional mester transmití e dokumentonan ei pa e gobièrnu saliente di Henry pa e konfirmá e outoridat dje mandatarionan nobo den un boletin ofisial di Estado.
E outoridatnan nobo ke traha for di e Palasio Nashonal den sentro di Port-Au-Prince, pero e edifisio ei a sufri vários atake di gèngnan den e último simannan. No mas ku ayera a skucha vários disparo serka dje palasio presidensial, segun residentenan dje zona.
E violensia dje gruponan, ku ta kontrolá 80% di e kapital, a hasi e krísis humanitario den Haiti hopi mas grave, ku skarsedat di kuminda, remedi i otro produktonan básiko.
