PARIS (AFP).- Fransia ya no tin interes “pa papia ku funshonarionan ruso”, segun e minister franses di Relashonnan Eksterior despues di un kombersashon telefóniko djárason siman pasá entre ministernan di defensa riba e lucha anti terorista, ku a habri kaminda pa algun komunikado pika.
“Nos no tin interes pa sigui papia ku alto funshonarionan ruso pasobra e komunikadonan ku ta sali, e reportenan, ta mentiroso”, segun e kansier franses, Stephane Sejourné, na prensa.
Despues di un kombersashon djárason entre e ministernan di defensa franses, Sebastien Lecornu, i e ruso, Serguéi Shoigu, ku tabatin komo meta pa transmití “informashonnan útil” na e rusonan riba e atentado di Mòsku, e presidente franses Emmanuel Macron a denunsiá “komentarionan menasante” di e rusonan.
Riba su informe tokante e kombersashon, Rusia a señalá di “ta spera” ku e servisionan sekreto franses no ta impliká den e atentadonan na Mòsku dia 22 di mart ku a kousa 144 morto, un deklarashon ku a keda desmentí pa e gobièrnu franses.
Promé ku papia k’e rusonan, “ta nesesario pa kuminsá na pone konfiansa”, Sejourné a bisa.
Macron a hustifiká e interkambio entre e ministernan franses i ruso, e promé for di òktober di 2022, pasobra Fransia tin “informashonnan útil” pa transmití “riba e orígen i e organisashon dje atentado”.
E atake a keda reklamá pa e grupo Estado Islámiko, pero Rusia ta kulpa Ukrania, kaminda Mòsku den febrüari di 2022 a lansa un invashon.
