SIUDAT DI VATIKANO (AFP).- Vatikano a publiká un teksto doktrinal nobo dediká na rèspèt pa “dignidat humano” den kua ta denunsiá aborto i e teoria di género i ta defendé e derechinan di migrantenan i personanan LGTB+.
E dokumento, yamá “Dignitas Infinita” tin komo binti página i a keda aprobá pa papa Francisco.
Por les’é komo un manera pa salba divishonnan den iglesia, kuater luna despues dje skandal relashoná ku bendishon di parehanan homoseksual, algu ku e konservadornan den iglesia katóliko no ta aprobá.
E dokumento ta trata temanan klave dje pontifikado di Jorge Bergoglio, manera guera, derechi di personanan migrante, pobresa, ekologia i hustisia sosial, ademas di asuntunan relashoná ku violensia riba internèt.
E teksto, resultado di sinku aña di trabou, a keda publiká pa “Dicasterio para la Doctrina de la Fe”, e poderoso entidat di Santa Sede enkargá dje dogma ku ta atendé kasonan di “violashon konkreto i grave” di dignidat.
Pa promé biaha di forma asina spesífiko, Vatikano ta denunsiá e “teoria di género”, na kua Francisco ta referí komo”kolonisashon ideológiko hopi peligroso”.
“Kualke intervenshon di kambio di sekso ta kore e riesgo, di forma general, di menasá e úniko dignidat ku un persona ta risibí na momento di e konsepshon”, segun e dokumento ta bisa.
Den mes rosea, iglesia ta rekordá ku personanan LGTB+ mester keda respetá i ta denunsiá ku “na algun lugá, hopi ta keda mandá prizòn, ta keda torturá i te asta ta priva nan di sierto kos di bida djis pa motibu di nan orientashon seksual”.
“Masha poko ta papia dje violashon aki di derechinan humano, i ta doloroso ku algun katóliko ta defendé e leinan inhustu aki”, segun a keda lamentá pa e kardenal argentino Victor Manuel Fernandez, persona yegá na Papa i firmante dje teksto.
Tambe ta dediká un parti na e violensia machista, afirmando ku “nunka esaki lo keda sufisientemente kondená”.
Pa loke ta fin di bida, Iglesia Katóliko ta asentuá su firme oposishon na eutanasia.
