LA PAZ, AP.- Bolivia ta logrando un akuerdo polítiko pa realisá elekshon ku no ta kontemplá partisipashon di eks presidente Evo Morales. E eks mandatario ta akusá ku terorismo despues di un luna di protesta sosial den e pais andino kual a laga por lo ménos 32 morto te ainda.
“Nos a forma 95% di e akuerdo i nos ta hasiendo hopi esfuerso pa avansá mas lihé posibel, ku tur forsa polítiko pa realisá elekshon”, asina e senador Omar Aguilar di Movimiento Al Socialismo (MAS), kual ta Morales su partido.
Desde su oposishon, senador Shirley Franco a splika na prensa ku Morales i eks visepresidente Alvaro Garcia Linera no ta apto pa partisipá.
Entretantu, e minister di Gobièrnu, Arturo Murillo, a presentá dos demanda penal kontra Morales i e eks minister di Presidensia, Juan Ramon Quintana, ku terorismo.
E desishon a keda anunsiá despues ku un video a surgi kaminda Morales tabata deliberando kon pa blòkia kareteranan pa laga algun siudat sin kuminda. “Lo verifiká e oudio na Argentina i nos lo pidi e empresa di telefòn pa verifiká di unda e yamada a bini”, asina fiskal general Juan Lanchipa a bisa.
