PARKLAND, FLORIDA, MERKA, AP.- Studiante i profesornan a brasa i yora durante nan regreso djárason na e skol sekundario Marjory Stoneman Douglas, pa promé biaha desde ku un adolesente a mata 17 persona ku un arma di asalto i a pone e institushon di Florida den sentro di un debate di kontròl di arma.
Lèsnan a kuminsá mas despues pa e kasi 3.300 studiantenan ku a presensiá e masakre aki.
“Na komienso, tur tabata hopi serio, pero despues tur hende a kuminsá animá i komportá manera e situashon tabata promé ku e tiroteo. E alumno, maestro i trahadónan a kuminsá hari i chansa ku otro”, asina Kyle Kashuv, un alumno a agregá despues ku el a brasa tur profesor.
Durante su entrada den e skol, e adolesentenan a wòrdu kompañá pa sentenar di agentenan polisial, kende tabata kompañá pa animalnan di terapia, inkluyendo kachó, kabai i un buriku.
Kashuv a indiká ku e tabata sorprendé pa e sosten impreshonante di komunidat, inkluyendo presensia polisial, animal i personanan ku bon deseo. Tabatin kartanan di rònt mundu i “bòrchinan di plak na kada un di e murayanan”.
Algun di e agentenan tabatin armanan militar i e superintindente Robert Runcie a indiká ku e presensia polisial fuerte lo kontinuá pa restu di e aña eskolar.
