GINEBRA, AP.- Un tenista dos biaha kampion di Wimbledon, dos ganadó di Tour de France i un medayista di oro pa weganan olímpiko tabatin e mesun kontesta djaweps den e filtrashon mas resien di su informashon médiko konfidensial di parti di piratanan informátika: “i kiko”? Petra Kvitova, Bradley Wiggins, Chris Froome i Robert Harting a reakshoná ku sarkasmo i chansa na filtrashon di e base di dato di Agensia Mundial Antidope (AMA).
E kuater atletanan a bisa ku su uso di remedinan aprobá ya a wòrdu informá di forma públiko. AMA ta kere ku e atake informátika aki ta vengansa pa investigashonnan tokante e programa di dope ruso ku respaldo gubernamental.
Kvitova, Harting i froome tabata e nòmbernan mas destaká entre 25 atleta di ocho pais, inkluyendo dies di Merka. E registronan konfidensial riba uso di remedi outorisá a wòrdu filtra atrobe djarason anochi. E tres pèrsonanan a kompetí den Olímpiko di Rio 2016, kaminda Kvitova i froome a gana medaya di bròns.
