FORTH WORTH, TEXAS, MERKA, AP.- American Airlines a anunsiá djabièrnè ku lo para su buelonan pa Venezuela pa motibu di seguridat despues ku e sindikato di piloto a pidi su miembronan pa ninga di operá pa e pais.
E aerolínea merikano tabata bula diariamente pa Caracas i Maracaibo desde Miami. E aerolínea a informá djabièrnè ku a para e buelonan temporalmente i ku lo no operá pa ningun pais konsiderá komo no safe.
Djaweps anochi, e presidente di Asosiashon di Pilotonan Aliado a instruí su miembronan pa rechasá e asignashonnan di Venezuela. Daniel Carey a señalá ku Departamento di Estado a atvertí riba e krímen i detenshon di siudadanonan merikano. Merka a saka su último diplomátikonan di e pais djaweps.
Otro aerolíneanan merikano i estranhero a stòp di bula pa Venezuela debí na e situashon ekonómiko i polítiko di e pais kual a deteriorá durante último añanan.
