SIUDAT DI MEXICO, AP.- Pa promé biaha den su historia resien, Mexico a vota pa iskierda.
E faborito den elekshon presidensial di djadumingu, Andres Manue Lopez Obrador (AMLO), a ofresé un promesa di transformá e pais ku a mustra di ta fadá di e polítikonan tradishonal ku a kousa hopi violensia i korupshon. AMLO a sigurá ku e lo enkabesá un reforma radikal pasífiko ku ta permitié pa atendé ku esnan pober tambe.
AMLO, manera su siguidónan konos’é, a wòrdu rekonosé pa su kontrinkantenan komo e triunfadó den elekshon mas grandi den historia di Mexico i asta promé ku e sifranan ofisial a bira konosí.
E kurason di Siudat di Mexico, e sentro históriko, tabata yená ku aplouso i gritunan selebrando na momentu ku Lopez Obrador a start su diskurso di viktoria promé den un hotèl i despues a dirigí pa Zocalo, un sitio di simbolismo polítiko fuerte.
AMLO reafirmá su ideanan ku el a mantené a lo largo di su kampaña. “Mi kier pidi e mehikanonan pa rekonsiliá, pone tur interes personal i general un banda, e patria ta na promé lugá”, asina el a bisa dilanti di míles di su simpatisadónan.
