BUENOS AIRES, AP.- E filial lokal di e kadena di kafetaria Starbucks a pidi diskulpa na su klientenan pa ofresé produktonan den kùp di fabrikashon lokal i di ménos kalidat ku esnan kumpra den eksterior debí na trabanan di importashon poné pa e gobièrnu argentino.
“Nos ke pidi diskulpa, ya ku debí na un kiebro temporal di stòk, den algun di nos tiendanan, a usa kùpnan nashonal. Ta trata di kùpnan kolo blanku i di mesun tamaño ku ta wòrdu ofresé regularmente”, asina e kompania a bisa den un komunikado publiká djaluna riba su página di Facebook i Twitter.
E gobièrnu argentino ya ta aplikando restrikshonnan fuerte for di 2011 pa ku e importashon pa ekilibrá e balansa komersial i brek un salida di divisa.
E polítika ei a kousa trastornonan serio na vários sektor di ekonomia ku ta dependé di produktonan importá. Paisnan manera Brasil i Union Oropeo tambe ta keha ya komo nan ta bisa ku a traba pa e ingreso di produktonan argentino.
Starbucks Argentina no kier a hasi mas komentario riba e kaso aki despues ku AP a konsulta nan.
“Di tur forma, nos ta trahando pa e situashon aki normalisá mas lihé posibel i pa kada un di bosnan disfrutá di boso bibida manera ta kustumber”, asina e kadena di kafetaria a informá.
