BOGOTÁ, AP.- E krísis polítiko ku ta asotá Venezuela i e salida di su abitantenan ta un di e temanan prinsipal di e 49 asamblea general di e Organisashon di Estadonan di Amérika kual ta kuminsá awe na Medellin.
Diplomátikonan di 35 pais lo tei presente, i lo papia tokante un gama amplio di tema, kual ta inkluí protekshon di derechi humano, e lucha kontra gruponan terorista i tambe ‘scam’ internashonal pa prevení uso di ekiponan hòrta.
Pero e sekretario general di OEA, Luis Almagro, a purba haña un solushon konkreto pa e abitantenan di Venezuela durante vários luna. E pueblo su derechinan ta wòrdu violá diariamente pa e régimen di Nicolas Maduro.
Almagro a proponé pa reforsá e sanshonnan ekonómiko kontra Maduro su gobièrnu, komo un forma pa preshon’é pa e aseptá ku e pais lo realisá elekshon ku kontrol internashonal i garantianan pa oposishon. E eks kansier uruguayo tambe a sugirí pa yega na un transishon polítiko na Venezuela mediante un “intervenshon humanitario” kual por inkluí e uso di forsa militar den e pais.
