MIAMI, AP.- E visepresidente Mike Pence a pidi e komunidat latino pa sostené Donald Trump su reelekshon i a primintí ku Merka nunka lo kombertí den un pais sosialista manera Cuba, Venezuela òf Nicaragua.
Pence a yega Miami pa lansa e koalishon “Latinos for Trump”, un grupo di lidernan empresarial, aktivista i polítikonan den e pais kompleto ku lo duna konseho na e kampaña di presidente Trump, kende ta purbando di kaptura voto di e komunidat hispániko.
Su yegada a tuma lugá un siman despues ku Trump a lansa su kampaña di reelekshon na siudat di Orlando, den sentro di Florida, i promé ku 20 kantidat demókrata realisá nan promé debate presidensial djárason i djaweps na Miami.
Florida, un estado indesiso, por resultá klave den e elekshon aki.
12,7 mion latino a vota den elekshon presidensial di 2016, ekivalente na 9,2% di tur votadó, segun informashon di senso. Algu mas ku 1,5 mion hispániko a vota na Florida, kual ta 18% do e votonan estatal i 12% di e voto latino nashonal.
Pence a bisa ku e presidente mester di kuater aña mas pa e ekonomia sigui prosperá, pa hasi frontera na México mas safe i pa kongreso aprobá un reforma migratorio integral.
Un grupo di demókrata a realisá un pènel pa kritiká e republikanonan su esfuerso pa aserká e komunidat latino.
