ANNAPOLIS, MARYLAND, MERKA, AP.- Un hòmber ku resentimentu akumulá kontra un korant den e kapital di Maryland a keda enkarselá sin fiansa djabièrnè pa sinku kargo di asesinato premeditá, un dia despues di drenta den e lugá ku un skopèt i mata sinku persona, den un di e atakenan mas grave kontra periodistanan den historia di Merka.
Jarrod W. Ramos, di 38 aña, a wòrdu detené na momentu ku e tabata skondé bou di un lèsenar den Kapital Gazzette na Annapolis, segun indikashon di polis.
“E tipo tabata ei den pa purba mata mas tantu hende ku e por”, asina e hefe di polis di kondado Anne Arundel, Timothy Altomare a bisa.
Ramos no a kooperá ku su investigadónan, segun indikashon di polis djabièrnè. Ramos tabata opservá atentamente, pero e no a papia. Su defensornan públiko no a duna komentario pafó di korte.
E fiskal general di estado Wes Adams a bisa ku e konklushon di hues ku Ramos ta un peliger pa sosiedat ta hustifiká debí na e evidensia ku el a plania su atake kuidadosamente i a blòkiá e porta patras pa e víktimanan no skapa, promé ku el a usa un “enfoke táktiko pa yag i tira personanan inosente”.
Ramos tin un historia largu di problema ku e korant, inkluyendo un demanda i menasa na esaki su periodistanan riba Twitter.
