TANTA, AP.- Dos iglesia den diferente siudat egipsio a keda ataká ku bòm miéntras e fielnan tabata selebrá djadumingu di rama, matando por lo ménos 43 persona i lagando mas di 100 hende heridá. E atakenan a keda efektuá pa e grupo di Estado Islámiko.
E eksploshonnan a produsí na kuminsamentu di siman santu, kaminda ta selebrá Pasku i simannan promé ku Papa Francisco bishitá e pais mas poblá di mundu ku arabirnan. E atakenan a sòru pa mas temor di e ekstremistanan islámiko ku ta luchando basta tempu kaba kontra forsanan di seguridat den e península di Sinai.
Papa Francisco a kondená e atakenan ku eksplosivo i a bisa ku e ta manda palabranan di kondolensia na su ruman Papa Teodoro II, na e iglesia i na henter e nashon egipsio. E notisia di e atentado a bin na momentu ku e pontífise argentino tabata presidiendo un misa djadumingu di rama na plasa di San Pedro di Vatikano.
Ta trata di un di esnan mas resien di un seri di atake kontra e minoria kristian di e pais, ku ta representá 10% di e poblashon i tabata blanko di ekstremistanan na vários okashon.
Den e promé atake, un bòm a eksplotá den e iglesia di San Jorge den e siudat di Tanta na Delta del Nilo matando por lo ménos 27 persona i heridando 78 mas, segun outoridatnan.
Algun ora despues otro eksploshon ta surgi den katedral di San Marco na kosta di Alejandria, e sede históriko di e kristiandat Egipsio matando por lo ménos 16 persona i heridando 4 despues ku Papa Teodoro II a terminá di ofisiá su sirbishinan. Su ayudantenan a bisa mas despues na medionan lokal ku Papa a logra skapa sin keda heridá.
ISIS a atribuí e atakenan atraves di su agensia di notisia Aamaq.
