GAUHATI, INDIA, AP.- E kantidat di morto pa e inundashonnan na sùit di Asia a oumentá na 160 persona, miéntras miónes i animalnan ta sigui sufri di e efektonan den tres pais, segun splikashon di outoridat djasabra.
Por lo ménos 90 persona a muri na Nepal i 62 a pèrdè nan bida den estado di Assam, na India. Diferente persona a muri na Bangladesh.
Dies neushoorn a muri den e Parke Nashonal Kaziranga despues ku Riu Brahmaputra a inundá e área, segun splikashon di Shiv Kumar, funshonario di e gobièrnu di Assam.
4,8 mion persona di 3.700 lokalidat den estado nororiental indio a keda afektá pa e inundashonnan aki. E kantidat di awa a baha durante e último 24 oranan, segun Outoridat di Ekipo di Desaster di Assam. Mas di 2,5 mion persona a keda afektá pa e oumento fuerte di awa den estado indio Bihar.
Un dama di 20 aña a duna luna na su promé yu den un boto djabièrnè mardugá, miéntras e tabata dirigiendo pa un hospital den lokalidat di Gagalmari, na Assam. E dama i su beibi no a keda transportá pa e sentro.
Outoridat a atvertí ku lo tuma medida kontra esnan ku proveé aros i otro produktonan básiko di mal kalidat entre esnan ku a tuma refugio den algun zona.
