TEHRAN, AP.- Yorando entre lamento di míles di persona, e lider supremo di Iran a resa pa restunan di e general iraní ku a fayesé den un atake di Merka na Baghdad. E operashon a oumentá tenshon entre Tehran i Washington drástikamente.
Iran a anunsiá djadumingu ku e pais lo no kumpli ku e límitenan di e akuerdo nuklear firma na aña 2015 ku potensianan internashonal i Parlamento di Irak a pidi pa ekspulsá e trupanan merikano for di su teritorio.
E suseso por motivá Iran pa konstruí un bòm atómiko, un atake di terseronan òf militarnan sostené pa Tehran kontra Merka i permití resurgimentu di Estado Islámiko na Irak, kombirtiendo Medio Oriente den un region muchu mas peligroso i instabil.
Presidente Donald Trump a menasaa ku eksigí Irak pa paga un kompensashon di algun mion dòler òf “introdusí sanshonnan fuerte” si e pais mantené su idea pa ekspulsá sòldatnan merikano.
E yu muhé di Soleimani, Zienab, a menasaa ku un atake kontra ehérsito di Merka den Medio Oriente. “Tur sòldat merikano su famia den Asia oksidental lo pasa nan dianan wardando riba morto di nan yunan”, asina el a afirmá.
