FRANKFURT, ALEMANIA, AP.- Banko Sentral Europeo a laga tasanan di interes i su polítikanan monetario intakto, meimei di un klima di insertidumbre debí na e salida britániko di Union Europeo i pa e disputanan komersial mundial.
E outoridat monetario pa e 19 paisnan ku ta usa euro tin un dilema: di un banda e kaida di komersio i manufaktura a debilitá e ekonomia pero di otro banda e merkado laboral a haña un impulso.
BCE a sigui ehèmpel di Reserva Federal di Merka pa retirá e medidanan di stimulá ekonómiko, apliká durante mas di un dékada dor di e krísis finansiero mundial, miéntras bankonan sentral rònt mundu ta determiná e próksimo pasonan. Fed a oumentá e tasa di interes na algun okashon, pero a kanselá su plannan pa sigui hasi esaki den aña 2019.
E hunta direktiva di BCE a disidí pa no modifiká su medidanan. E institushon a anunsiá vários paso pa impulsá ekonomia riba 7 di mart, manera por ehèmpel posponé e oumento di interes te na final di aña.
