LONDON, AP.- Diferente biahero a keda pegá na diferente parti di mundu djaluna, despues ku e operator britániko di turismo, Thomas Cook a deklará kiebra. Esaki a obligá e kompania pa kanselá kasi tur buelo i reservashon di hotèl i pa retirá tur su personal.
Outoridat di Aviashon Sivil di Gran Bretaña a konfirmá ku Thomas Cook, e empresa d 178 aña bieu i pionero den benta di paketenan turístiko a stòp di operá. E kompania a agregá ku e kuater aerolíneanan di e empresa lo stòp di operá tur avion i ku 21.000 empleado den 16 pais, inkluyendo 9.000 den Reino Uní, lo pèrdè nan puesto.
E kiebro lo afektá e industria di turista europeo i norafrikano, miéntras ku hotèlnan ta teme ku nan lo keda sin kobra. No ta evidente kuantu turista a keda desampará, pero algun filial a purba negoshá ku outoridat lokal pa sigui operá.
E gobièrnu britániko a informá ku prosedernan a kuminsá pa trese 150.000 kliente residente di Gran Bretaña, kual ta e repatriashon di siudadanonan britániko mas grandi den historia moderno. E proseso a kuminsá djaluna, pero outoridat a atvertí ku lo tin tardansa pa ku e prosedura di repatriashon.
Tabatin un total di 50.000 persona pega na Gresia; 30.000 na Islanan Canaria; 21.000 na Turkia; 15.000 na Chipre.
