WASHINGTON, MERKA, AFP.- Presidente Joe Biden a firma un gran proyekto di lei di kambio di klima i gastunan di kuido médiko, ku ta duna e demókratanan un impulso mas promé ku elekshonnan intermedio.
E lei, Inflation Reduction Act, ta wòrdu konsiderá pa Kas Blanku komo e kompromiso di mas grandi den historia di Merka pa aliviá kambio di klima, i tambe kambia e forma kon ta kalkulá preisnan di remedi i trese igualdat den e sistema di belasting, ku un impuesto mínimo di 15% pa tur korporashon.
“Un nashon por transformá. I esei ta loke ta sosodiendo”, asina Biden a bisa den un diskurso na Kas Blanku ku probablemente lo bira e base di su kampaña promé ku elekshon di novèmber.
Segun e plan, gobièrnu lo gasta alrededor di 370 mion dòler na inisiativanan di ‘green energy’ i tambe lo permití ku e sistema estatal Medicare por negoshá preisnan di remedinan, algu ku lo redusí preisnan haltu ku e merikanonan ta wòrdu obligá pa paga.
Pa paga esaki, e lei lo apliká un impuesto mínimo di 15% na korporashonnan, generando míles di miónes di dòler di entrada.
