WASHINGTON, MERKA, AFP.- E presidente merikano Joe Biden ke pa Afrika haña un ròl mas grandi na mundu.
“Merka ta kompletamente komprometé ku Afrika”, asina Biden a bisa na kasi 50 lider afrikano ku a reuní na Washington durante tres dia.
“Afrika mester ta presente na tur reunion kaminda ta papia di desafionan global i institushonal”.
Biden, kende a pidi un asiento permanente pa Afrika den konseho di Seguridat di Nashonnan Uní a respaldá un representashon permanente di e Union Afrikano den G20 i a anunsiá ku e tin un bishita plania, e promé di un presidente merikano desde 2015.
Su biahe ta bira e promé bishita di un mandatario merikano den e region desde 2015, desde ku Barack Obama a bishitá Kenia i Etiopia e aña ei.
Biden su antesesor, Donald Trump no a disimulá su falta di interes den Afrika supsahara i tabata e promé presidente den kuater dékada ku no a bishitá e region miéntras e tabata presidente.
Djárason Biden a boga pa un “gran aliansa” ku Afrika, kual su “éksito” ta klave pa mundu kompleto, i el a deskribí un serie di invershon di su pais den e kontinente afrikano.
Washington tin intenshon di yuda Afrika ku 55.000 mion dòler den vários sektor manera digital, salubridat e lucha kontra kambio di klima.
